El Nino drejt rekordit historik, 2027 mund të jetë viti më i nxehtë

El Niño mund të jetë më i fuqishmi i regjistruar ndonjëherë, paralajmërojnë meteorologët britanikë.

Fenomeni klimatik El Niño, i cili po zhvillohet në Oqeanin Paqësor, mund të jetë një nga më të fuqishmit e regjistruar ndonjëherë, madje potencialisht më i forti në historinë e matjeve.

Paralajmërimi vjen nga Zyra Meteorologjike e Mbretërisë së Bashkuar (Met Office), e cila thotë se fenomeni pritet të ketë ndikim të ndjeshëm në temperaturat globale dhe në modelet e motit në mbarë botën.

El Niño është një fenomen natyror që shfaqet zakonisht çdo dy deri në shtatë vjet dhe zgjat rreth një vit. Ai krijohet kur erërat pasat në Oqeanin Paqësor dobësohen ose ndryshojnë drejtim, duke bërë që ujërat e ngrohta të grumbulluara në pjesën perëndimore të oqeanit të zhvendosen drejt lindjes.

Nxehtësia e madhe e çliruar nga oqeani në atmosferë ndikon më pas në temperaturat globale dhe ndryshon modelet e reshjeve në pjesë të ndryshme të botës.

Shkencëtarët e konsiderojnë një fenomen si El Niño kur temperatura e sipërfaqes së detit në një zonë të caktuar të Paqësorit është të paktën 0.5 gradë Celsius mbi mesataren. Aktualisht, temperaturat janë më shumë se 2 gradë Celsius mbi normalen, ndërsa parashikimet sugjerojnë se diferenca mund të kalojë 3 gradë Celsius më vonë gjatë vitit.

Nëse kjo ndodh, do të bëhej fjalë për një ngjarje të paprecedentë në të dhënat që datojnë nga viti 1950 dhe potencialisht për El Niñon më të fuqishëm që nga shekulli XIX.

“Duhet të jemi të qartë se kjo është një ngjarje e paprecedentë. Nuk kam parë kurrë një sinjal kaq intensiv të El Niños në parashikimet tona”, tha prof. Adam Scaife, kreu i parashikimeve afatgjata në Met Office.

Sipas ekspertëve, temperaturat jashtëzakonisht të larta në shtresat më të thella të Oqeanit Paqësor mund ta fuqizojnë më tej fenomenin.

Në disa zona, temperatura e ujit në një thellësi prej rreth 100 metrash është matur deri në 8 gradë Celsius mbi normalen. Kjo ka krijuar një rezervuar të madh nxehtësie nën sipërfaqen e oqeanit, i cili mund të furnizojë dhe të forcojë më tej El Niñon.

Pasojat e fenomenit kanë filluar të ndihen tashmë në disa pjesë të botës.

Në Azinë Jugore, reshjet e musoneve janë nën nivelet normale, ndërsa në Atlantikun tropikal aktiviteti i uraganeve është më i ulët. Në Australi është rritur rreziku për thatësira dhe zjarre, ndërsa në Peru, Ekuador dhe jugun e Shteteve të Bashkuara mund të rritet rreziku për përmbytje.

Në Mbretërinë e Bashkuar dhe Evropën veriperëndimore, El Niño mund të sjellë një vjeshtë më të lagësht dhe me më shumë stuhi.

Fenomeni mund të rrisë gjithashtu mundësinë për periudha më të ftohta drejt fundit të dimrit, megjithëse kjo lidhje është më pak e drejtpërdrejtë.

Megjithatë, ekspertët paralajmërojnë se ndikimi më i madh i këtij El Niños në temperaturat globale mund të ndihet gjatë vitit që pason kulmin e fenomenit.

Shkencëtari i klimës në Met Office, Dr. Nick Dunstone, tha se sasia e madhe e nxehtësisë që oqeani po çliron në atmosferë mund të shkaktojë një rritje të temperaturës mesatare globale, veçanërisht gjatë vitit pas kulmit dimëror të El Niños.

Për këtë arsye, sipas tij, 2027 mund të jetë viti më i nxehtë i regjistruar ndonjëherë, duke kaluar rekordin aktual të vendosur në vitin 2024.

Një El Niño i fuqishëm mund të ketë gjithashtu pasoja të rëndësishme për bujqësinë dhe sigurinë ushqimore.

Thatësirat, përmbytjet dhe ndryshimet e forta të kushteve atmosferike mund të dëmtojnë prodhimin bujqësor dhe të rrisin rrezikun për mungesa ushqimore, veçanërisht në vendet më të ekspozuara ndaj ndikimeve të fenomenit. /Ora News

Më të lexuarat